महानगरमा शक्तिहीन बने बालेनः न कार्यपालिका साथमा, न नगर प्रहरी हातमा

२१ जेठ, जनकपुरधाम ।  प्रमुख प्रशासकीय अधिकृत सरोज गुरागाईंले नगर प्रहरी प्रमुख राजु पाण्डेलाई निलम्बन गरिदिएसँगै काठमाडौं महानगरभित्र मेयर बालेन्द्र साह पूर्णरूपमा एक्लिएका छन् । अहिलेसम्म मेयरलाई साथ दिइरहेको नगर प्रहरीसमेत बालेनको पकडबाट फुस्किएको छ ।

प्रशासकीय अधिकृत गुरागाईंले आफूलाई कार्यालय प्रवेशमा अवरोध गरेको घटनालाई लिएर एसएसपी पाण्डेलाई कारवाही गरेका हुन् । उक्त घटनाका विषयमा छानविन गर्न जाँचबुझ समिति समेत बनाइएको छ । बढीमा ६ महिनाका लागि पाण्डेलाई निलम्बनमा राख्दै गुरागाईंले नगरप्रहरीको तत्कालीन नेतृत्व एसपी विष्णु जोशीलाई दिएका छन् । अहिलेसम्म कर्मचारी र जनप्रतिनिधलाई विश्वासमा लिन नसकेका बालेनले नगरप्रहरीको आडमा महानगर चलाइरहेका थिए । आफैंले नगर प्रहरी प्रमुख बनाएको हुँदा राजु पाण्डेको बालेनलाई पूर्ण समर्थन र साथ थियो । कानूनतः नगर प्रहरीलाई प्रशासकीय अधिकृतले कमाण्ड गर्ने भए पनि पाण्डे सिधै बालेनको आदेशमा चल्ने गर्थे ।

बालेनकै निर्देशन बमोजिम गत चैत २१ मा प्रशासकीय अधिकृत गुरागाईंलाई कार्यालय आउन नदिन पाण्डेको नेतृत्वमा नगर प्रहरी परिचालित भएका थिए । तर, जनप्रतिनिधि र कर्मचारीले गुरागाईंलाई कार्यालय पुन:स्थापित गराइ छाडे ।

उक्त घटनापछि बालेनको प्रशासकीय अधिकृतसँग पानी बाराबारकै स्थिति छ । उपमेयर सुनीता डंगोलसँग पनि बालेनको सम्वन्ध बिग्रिएको छ । आपसी समन्वयमा महानगर चलाउनुपर्ने प्रमुख तीन व्यक्तिहरूबीच नै चरम अविश्वास र असमझदारी उत्पन्न भएपछि महानगरका महत्वपूर्ण काम कारवाहीहरू प्रभावित बनिरहेका छन् । लामो समयदेखि कार्यपालिका बैठक नै बस्न सकेको छैन ।

काठमाडौंका वडाध्यक्षहरू सबैजसो बालेनको खिलाफमा छन् । उनीहरूले बालेनको कार्यशैली अलोकतान्त्रिक, अपारदर्शी र मनोमानीपूर्ण रहेको भन्दै विरोध गर्दै आएका छन् । बालेनले जनप्रतिनिधि र कर्मचारीहरूलाई उपेक्षा गर्दै सचिवालयमार्फत महानगर चलाउन खोजेको आरोप छ । उनले फेसबुकमा निरन्तर सरकारविरुद्ध प्रहार गरिरहँदा एमाले-कांग्रेसका वडाध्यक्षहरू थप रुष्ट बनिरहेका छन् । बालेनलाई महानगरका कर्मचारीहरूको पनि समर्थन छैन । प्रमुख प्रशासकीय अधिकृतलाई बिनाआधार भ्रष्टाचारी करार गर्न खोजेकोमा उनीहरू बालेनसँग असन्तुष्ट छन् । गुरागाईंलाई कार्यालयमा पुन:स्थापित गराउन कर्मचारीले जनप्रतिनिधिलाई बलियो साथ दिएका थिए ।

यसरी कर्मचारी र जनप्रतिनिधिको विश्वास गुमाइरहेका बालेनले कार्यपालिका बैठक बोलाउनै सकिरहेका छैनन् । महानगर कार्यपालिका बैठक महिनामा एकपटक बस्नुपर्ने कानूनी प्रावधान भए पनि ५ महिनादेखि बस्न नसकेको स्थिति छ । निकटस्थ स्रोतका अनुसार प्रशासकीय अधिकृतमा गुरागाईं रहेसम्म कार्यपालिका बैठक नै नराख्ने बालेनको रणनीति छ । तर, चाँडै नै महानगरको नीति तथा कार्यक्रम र बजेट बनाउनुपर्ने भएकाले उनी दबाबमा छन् ।

कार्यपालिकाभित्र अल्पमतमा परेकाले पनि बालेन बैठक बोलाउन हिच्किचाइरहेका हुन् । उनी कार्यपालिका बैठकबाट आफूले चाहेको निर्णय गराउन सक्ने अवस्थामा छैनन् ।