१९ पुष, जनकपुरधाम । आज जनकपुरधामको जानकी मन्दिरबाट भारतको उत्तर प्रदेश स्थित अयोध्यामा नवनिर्मित राम मन्दिरको लागि ११ सय भन्दा बढी कोसेली (भार) पठाईएको छ ।
अयोध्यामा आगामी जनवरी २२ तारिखमा हुने नवनिर्मित राम मन्दिरको प्राण प्रतिष्ठा कार्यक्रमका लागि जानकीको माईतबाट रामको घर अयोध्यामा जानकी मन्दिरले ११ सय भन्दा बढी कोसेली (भार) जनकपुरधामको परिक्रमा गर्दै त्यस तर्फ पठाएको हो ।
मिथिलाञ्चलमा छोरीको ससुरालमा गृह प्रवेश भएको खण्डमा माईतबाट कोसेली पठाउने चलन छ । त्यही विधि अनुसार अयोध्यामा नवनिर्मित राम मन्दिरको प्राण प्रतिष्ठा (घरबास)मा सीताको माइतीघरबाट कोसेली लगिएको हो ।
कोसेलीमा काजु, किसमिस, पञ्चमेवा, चाँदीको खराउ, चाँदीको धनुष, पुरुकिया, दहि चिउरा, अदौरी, दनौरी, चामल, दाल, साडी, धोती, ठेकुवा, भुसुवा, खाजा, मिठाई, खजुरिया फलफूल, पञ्चमेवा, सुन चाँदीका गरगहना लगायतका सामग्री अयोध्याका लागि पठाईएको हो । अयोध्या जाने गाडीहरुलाई विशेष रुपमा सजाइएको छ ।
अयोध्याका लागि पठाईएको भार मध्ये बढी भार जानकी मन्दिरले तयार पारेको छ भने सीता जनकपुरबासीको छोरी, बहिनी भएको बिश्वासका साथ केही भार स्थानीय जनकपुरधामबासीले पनि पठाएका छन । तयारी भारहरु विभिन्न गाडीहरुमा पठाईएको छ । जनकपुरधामबाट पाँच वटा बस, ४ वटा ट्रक र करिब २० वटा सानो गाडीमा श्रद्धालु सहित प्रस्थान गरेको हो ।
कोसेली (भार) जनकपुरबाट निस्केर महोत्तरीको जलेश्वर बाट हुलाकी राजमार्ग हुँदै, मलंगवा, गौर, कलैया बाट विरगंजमा पुगेर रात्री बास बसेको छ भने भोलि (शुक्रबार) बिहान सीमापारी रक्सौल हुँदै बेतिया, गोरखपुर र अन्तिममा अयोध्या पुग्ने जानकी मन्दिरका छोटे महन्थ रामरोशन दासले बताए । वीरगंजसम्म पुग्दा भार थपिन सक्ने अनुमान छ । रुटमा पर्ने नगरपालिकाहरुबाट भार थपिने कुरो रहेको महन्थ दासले बताए ।
उनका अनुसार शनिबार बिहान ९ बजे राम जन्म भूमि ट्रष्टलाई उक्त कोसेलीहरु हस्तान्तरण गर्ने कार्यक्रम रहेको छ । त्यसपछि भार लिएर जाने टोली जनकपुरधाम फर्किने छ । भारसहित जनकपुरधामका मेयर मनोज साहसहित संयौंको संख्यामा श्रद्धालुहरु अयोध्याका लागि प्रस्थान गरेका छन ।
मन्दिर उद्घाटनमा लगिने भारले जनकपुरधाम र अयोध्याबीच प्रगाढ सम्बन्ध स्थापित हुने छोटे महन्त दासले बताए । उनले सदीयौदेखिको दुबै देशबीचको सम्बन्ध अझै बलियो हुने बताए । यसले विश्वजगतमा छुट्टै सन्देश जानुको साथै पर्यटन प्रबद्र्धनमा पनि टेवा पुग्ने विश्वास उनले व्यक्त गरे ।
यसअघि निर्माणाधीन राम मन्दिरको प्राणप्रतिष्ठा हुने दिनको लागि अभिषेक गर्न नेपालबाट जल पठाइसकेको छ । यहाँको बिभिन्न पवित्र नदीहरुबाट संकलन गरिएको जल अभिषेक गर्नका लागि पठाइएको छोटे महन्त दासले बताए । सो जल विश्व हिन्दू परिषद् नेपालको नेतृत्वमा जनकपुरधामबाट संकलन गरी अयोध्या लगिएको थियो ।
यो भन्दा पनि केही अघि अयोध्यामा मन्दिर बन्न थालेपछि गत फ्रेबुअरीमा नेपालको कालीगण्डकी किनार बाट दुईवटा शिलाहरू अयोध्या पु¥याइएको थियो । म्याग्दीको बेनी नगरपालिका वडा नम्बर–६ ठूलोबगरस्थित कालीनदी किनारबाट १४ र २७ टनका दुईवटा शिलाहरू जनकपुरधामस्थित जानकी मन्दिरमार्फत अयोध्या पठाइएको थियो ।
भिडियोको लागि यहाँ क्लिक गर्नुहोस ।
