१ भदौ २०८२, जनकपुरधाममा पत्रकारमाथि आक्रमण गर्ने वकिलहरूलाई पक्राउ गरी कानूनी कारबाहीको माग गर्दै पत्रकारहरू आन्दोलित भएका छन्।
नेपाल पत्रकार महासंघ धनुषाको अगुवाइमा आइतवार धर्नामा बस्दै उनीहरूले पत्रकारमाथि आक्रमण गर्ने वकिलहरूलाई तत्काल पक्राउ गर्न माग गरेका छन्। गुठी संस्थानबाट महासंघले कानूनी प्रक्रिया पूरा गरी लिजमा लिएको ४ कठ्ठा जग्गा गत साउन २७ गते संरक्षण गर्ने क्रममा नेपाल बार एशोसिएसन जनकपुरका पदाधिकारीसहित वकिलहरूले पत्रकारमाथि आक्रमण गरेका थिए ।
पत्रकार महासंघ धनुषाका अध्यक्ष पुरन साहले महासंघ प्रादेशिक भवन निर्माणका लागि गुठी संस्थानसँग सम्झौता गरी जग्गा लिजमा भएको भए पनि नेपाल बार एशोसिएसन जनकपुरमा आबद्ध वकिलहरूले सो जग्गा आफ्नो मातहत भएको दाबी गर्दै विवाद सिर्जना गरेको बताए। उनले सोही विवादलाई लिएर वकिलहरूले पत्रकारमाथि साङ्घातिक आक्रमण गरे पनि प्रहरीले अहिलेसम्म कसैलाई पक्राउ नगरेको आरोप छ। प्रहरीले कारबाहीको लागि कुनै कदम नचाल्दा आफूहरू धर्नामा बस्न बाध्य भएको उनको भनाइ छ।
महासंघ मधेस प्रदेश कमिटीका अध्यक्ष श्याम बञ्जाराले आक्रमणकारीविरुद्ध किटानी जाहेरी दर्ता गराए पनि स्थानीय प्रशासनले बेवास्ता गरेको भन्दै आक्रोश व्यक्त गरे। उनले देशव्यापाी आन्दोलन नहोस् भन्ने उद्देश्यले अहिलेलाई शान्तिपूर्ण धर्नाको माध्यमबाट स्थानीय प्रशासनलाई दबाब दिएको उल्लेख गर्दै पत्रकारमाथि आक्रमण गर्ने वकिलहरूमाथि कारबाही नगरिए आन्दोलनको शैली परिवर्तन गरेर देशव्यापी आन्दोलन गर्ने चेतावनी दिए।
आन्दोलनरत पत्रकारहरूले आक्रमण गर्ने वकिलहरूलाई कारबाही गर, प्रेस स्वतन्त्रताको रक्षा गर, पत्रकारहरूलाई सुरक्षा देऊ लगायतका नारा लेखिएको प्लेकार्ड बोकेका थिए।