०७ असोज २०८२ धनुषा, लक्ष्मिनिया
द एशिया फाउण्डेशन र दलान नेपालको सहकार्यमा सञ्चालित “एकल महिलाहरूको अधिकारका लागी सहयोग” परियोजना सफलता पूर्वक सम्पन्न भई औपचारिक रूपमा गाउँपालिकालाई हस्तान्तरण गरिएको छ । यस अवसरमा सिकाई तथा उपलब्धि आदान प्रदान कार्यक्रम आयोजना गरी परियोजनाको अन्तिम प्रतिवेदन, हासिल गरिएका नतिजा, सहभागीहरूको विवरण, टिम लिडरहरूको जानकारी तथा विस्तृत केस स्टडी प्रस्तुत गरिएको थियो ।
परियोजनाबाट देखिएका उपलब्धि तथा एकल महिलामा आएको चेतना, आत्मबल, अधिकारका लागि वकालत गर्ने क्षमता र आपसी एकताको संस्कृति कार्यक्रममा मुख्य आकर्षण बनेको थियो ।
कार्यक्रममा बोल्दै लक्ष्मिनिया गाउँपालिकाकी उपाध्यक्ष फूलकुमारी यादवले परियोजनाले एकल महिलाको जीवनमा सकारात्मक परिवर्तन ल्याएको भन्दै उच्च प्रशंसा व्यक्त गर्नुभयो । उहाँले आगामी वर्षदेखि नै एकल महिलाको आर्थिक सशक्तिकरणका लागि छुट्टै बजेट विनियोजन गर्ने प्रतिबद्धता समेत जनाउनुभयो ।
त्यस्तै, प्रमुख प्रशासकीय अधिकृत राजगीर महतो, प्रशासन अधिकृत पुनिता यादव, वडाध्यक्षहरु, गाउँपालिकाका सम्पूर्ण शाखा प्रमुख, सञ्चारकर्मी र सरोकारवालाहरूको उपस्थिति रहेको कार्यक्रममा दलान नेपालका कार्यकारी निर्देशक धर्मानन्द ठाकुरले परियोजनाले देखाएको परिणामलाई दिगो बनाउन स्थानीय सरकारसँगको सहकार्य निर्णायक हुने बताउनुभयो । उहाँका अनुसार, परियोजनाले एकल महिलाहरूलाई “स्वतन्त्र र सम्मानजनक जीवन” को बाटोमा अगाडि बढ्न प्रेरित गरेको छ । वडा अध्यक्ष लालजी साह तेली का अनुसार दलान नेपाल ले हाम्रो समाजमा उदाहरणीय काम गरेको बताउनु भयो । कार्यक्रममार्फत औपचारिक रूपमा परियोजना सम्पन्न प्रतिवेदन लक्ष्मिनिया गाउँपालिकालाई बुझाइएको छ । गाउँपालिकाले यस परियोजनालाई निरन्तरता दिने मात्र नभई आवश्यक कार्यान्वयनका पहल गर्ने र एकल महिलाको हक अधिकार र आर्थिक सुदृढीकरणमा कुनै कमी नगर्ने प्रतिबद्धता समेत व्यक्त गरेको छ ।
यस कार्यक्रमले आपसी सिकाइ, अनुभव आदान–प्रदान र दिगोपनाका लागि बलियो साझेदारीको आधार तयार गरेको दलान नेपालले जनाएको छ ।