९ मंसीर, जनकपुरधाम । संस्थागत बिद्यालयका संचालकहरुले बिद्यालय बन्दको आन्दोलनलाई निरन्तरता दिने भएको छ ।
हिसान, प्याबसन, एन प्याबसन र नेपाल प्याबसनले जारी गरेको बिज्ञप्तिमा जनकपुरधाम उपमहानगरपालिका भित्र संचालित संस्थागत बिद्यालयहरुको माग हालसम्म पनि सम्बोधन नभएकोले बिद्यालय बन्दको कार्यक्रमलाई जारी राख्ने निर्णय गरेको उल्लेख छ । सो बिज्ञप्तिमा पालिकाले गरेको अब्यवहारिक निर्णयको कारण द्धन्द्ध सिर्जना हुन सक्ने अवस्था यथावत रहेको हुँदा बिद्यालय बन्दको आन्दोलनलाई निरन्तरता दिने जनाईएको छ । साथै सम्पुर्ण जनकपुरधाम बासी तथा सरोकारवालाहरुसँग यथाशिघ्र समस्याको समाधान गराई बिद्यालय खोल्ने बातावरण मिलाईदिन अपिल समेत गरेको छ ।
यता, जनकपुरधाम उपमहानगरपालिकाले शनिबार नै एक बिज्ञप्ति जारी गरी बिद्यार्थीले शिक्षा प्राप्त गर्न पाउनु संवैधानिक अधिकार रहेकाले आज आईतबार देखि सम्पुर्ण निजी बिद्यालयहरु खोल्न आग्रह गरेको थियो । साथै आग्रहलाई बेवास्ता गर्दै बिद्यालय बन्द राखेमा कारबाही हुने चेतावनी समेत दिएको थियो । सोही अनुसार आजदेखि केही निजी संस्थागत बिद्यालयहरु संचालनमा आएका छन भने अधिकाँश निजी बिद्यालयहरु पालिकाको आग्रहलाई बेवास्ता गर्दै बन्द नै राखेका छन ।
