२९ कातिक, जनकपुरधाम । जानकी महिला जागरण समाज (JWAS) र प्लान इन्टरनेशनल नेपालको साझेदारीमा सञ्चालित ‘दक्ष युवा परियोजना’ अन्तर्गत कार्तिक २७ र २८ गतेको डोनर्स भिजिट सफलतापूर्वक सम्पन्न भएको छ। यस अनुगमनमा प्लान इन्टरनेशनल नेपाल जर्मनी, काठमाडौं र धनुषा शाखाका पदाधिकारी तथा जानकी महिला जागरण समाजको संयुक्त टोलीले परियोजनाको प्रगतिसँगै स्वरोजगार र उद्यमशिलता प्रवर्द्धनका गतिविधिहरूको अवलोकन गरेका थिए।
डोनर्स टोलीले सबैला नगरपालिकामा संचालित व्यवसायीक तालिम तथा स्टार्टअप कार्यक्रमको अनुगमन गर्दै सहभागी उद्यमीहरूसँग भेटघाट र परामर्श गरेका थिए। सहभागीहरूले परियोजनाबाट पाएको सहयोग, व्यवसाय स्थापना तथा विकासमा आएका चुनौती र अवसरहरूबारे प्रत्यक्ष छलफल गर्न सके। साथै, टोलीले स्थानीय सरकारका नगर प्रमुख कारीराम यादव, उप-प्रमुख रहिमा खातुन लगायत प्रमुख अधिकारीहरूसँग पनि भेट गरी परियोजनाको दिगोपनाका सन्दर्भमा गहन छलफल गरेको थियो।
अनुगमनको क्रममा तालिम प्रदायक संस्था ‘एमएडब्ल्यू’ का प्रदेश स्तरीय प्रबन्धक रमेश जयसवाल र ‘नेपाल चौतारी’ का अध्यक्ष रामरतन यादवसँग पनि विचार-विमर्श गरिएको थियो। भेटवार्तामा परियोजनाका उद्यमी तथा तालिम लिएका युवाहरूले आफ्ना अनुभवहरू साझेदारी गरेका थिए, जसले परियोजनाको प्रभावकारिता झल्काएको थियो।
डोनर्स टोलीमा जर्मनीस्थित प्लान इन्टरनेशनलका अधिकारी जोनस, फाइनान्स अफिसर रुचि चौहान, प्लान इन्टरनेशनल नेपालका उपेन्द्र श्रेष्ठ, प्रतिमा कुँवर, पूर्व क्षेत्रीय प्रबन्धक रवि शंकर पण्डित, र दक्ष युवा परियोजनाका परियोजना विशेषज्ञ इन्द्र बहादुर हायू लगायत सहभागी थिए। जानकी महिला जागरण समाजको तर्फबाट अध्यक्ष मन्दाकिनी कर्ण, कार्यक्रम संयोजक विष्णु कुमार भण्डारी, तथा JC&MNE अफिसर सुस्मिता ठाकुर पनि टोलीमा सामेल थिए।
यस डोनर्स भिजिटपछि जर्मनीबाट आएका जोनस लगायत प्लान इन्टरनेशनल नेपालका प्रतिनिधिहरू JWAS नेपालले परियोजनाको सफल कार्यान्वयनमा पुर्याएको योगदानबाट निकै प्रभावित भएका छन्। सहभागीहरूले परियोजनाले ल्याएको सकारात्मक परिवर्तन, युवाहरूमा देखिएको आत्मनिर्भरता र उद्यमशिलता प्रवर्द्धनका गतिविधिहरूको प्रशंसा गरे।
यस भिजिटले भविष्यमा परियोजनाका गतिविधिहरूलाई अझ सशक्त र प्रभावकारी बनाउने अपेक्षा गरिएको छ। जानकी महिला जागरण समाजले आगामी दिनमा पनि परियोजनाको प्रभावकारी कार्यान्वयनमा निरन्तरता दिने प्रतिबद्धता जनाएको छ।
