२७ माघ, जनकपुरधाम । उपचारमा लापरबाही गर्ने जनकपुरको पीडारीचोकमा रहेको मुस्कान अस्पताल बन्द भएको छ ।
बिनादर्ता सञ्चालित मुस्कान अस्पताल मधेशका मुख्यमन्त्री सतिशकुमार सिंहको निर्देशनमा अस्पतालमा सञ्चालकले शनिबार तालाबन्द गरेर साँचो सरकारलाई बुझाएका हुन् ।
गत माघ ३ गते पित्तथैलीको शल्यक्रिया गरेपछि सर्लाहीको हरिपुर्वा नगरपालिका-५ की २५ वर्षीय बबिताकुमारी यादवको अहिलेसम्म होसमा नआएको घटना सार्वजनिक भएको थियो । त्यसपछि मुख्यमन्त्री सिंहले शुक्रबार राति अस्पतालमा छड्के अनुगमन गरेका थिए ।
मुख्यमन्त्री सिंहले दर्ता नरहेको र उपचारमा लापरवाही गरेको कारण आइतबार बिहान ११ बजेसम्म त्यहाँ रहेका बिरामीहरूलाई अन्यत्र अस्पतालमा व्यवस्थापन गरी ताल्चा बन्द गरेर साँचो बुझाउन निर्देशन दिएका थिए । त्यस्तै जटिल अवस्थामा पुगेकी बबितालाई राम्रो अस्पतालमा लगेर उपचार गराउन निर्देशन दिएका थिए ।
