तिस दिनभित्र माग सम्बोधन हुने शर्तमा भोलीदेखि निजी बिद्यालयहरु खुल्ने

१० मंसीर, जनकपुरधाम । बिगत एक हप्तादेखि बिद्यालय बन्द गरी आन्दोलन गरिरहेका निजी बिद्यालयका संचालकहरु भोली मंगलबारदेखि जनकपुरधाम भित्रका बिद्यालयहरु खोल्न तयार भएका छन ।

जनकपुर उद्योग बाणिज्य संघको पहलमा भएको हिसान, प्याबसन, एन प्याबसन, एम प्याबसन र नेपाल प्याबसन का पदाधिकारी, जनकपुर उपमहानगरपालिकाका शिक्षा शाखा प्रमुख तथा निमित प्रमुख प्रशासकिय अधिकृत धिरेन्द्र लाल कर्ण, नेबिसंघका पदाधिकारी र आन्दोलित बिद्यार्थीहरुका बिच सर्वपक्षिय वार्ताबाट संस्थागत बिद्यालयहरुको आन्दोलन स्थगित भएको छ ।

सो वार्ताबाट शिक्षा शाखा प्रमुखको संयोजकत्वमा तथा शिक्षाविद ज्ञानी यादव र सरोकारवाला सहितको ७ सदस्यीय अधिकार सम्पन्न समिति बनाइ निजी बिद्यालय र पालिका बिच भएका सम्पुर्ण समस्या ३० दिन भित्र सम्बोधन गर्ने सहमति भएको छ । आगामी ३० दिन भित्र माग सम्बोधन हुने आश्वासन पाएका निजी बिद्यालयका संचालकहरुले भोलीदेखि स्कुल खोल्ने जनाएका छन ।

साथै, संस्थागत बिद्यालयका संगठनहरुले जारी गरेको संयुक्त बिज्ञप्ति मार्फत सार्थक वार्ताका लागि पहल गर्ने सम्पुर्णमा धन्यबाद ज्ञापन प्रकट समेत गरेको छ ।

कक्षा ११ र १२ मा छात्रवृति पाएका बिद्यार्थीहरुको शुल्कको बिषयलाई लिएर बिगत एक हप्ता देखि जनकपुरधाममा संचालित निजी बिद्यालयका संचालकहरु बिद्यालय नै बन्द गरेर आन्दोलित भएका थिए । पछिल्लो पटक जनकपुरधाम उपमहानगरपालिकाले निजी बिद्यालयहरुलाई छात्रवृति पाएका बिद्यार्थीहरुबाट असुलेको सम्पुर्ण शुल्क फिर्ता गर्नुपर्ने निर्देशन दिएपछि बिवाद चुलिएको थियो । यता, निजी बिद्यालयहरुले पालिकाले एकै बर्षमा दुई थरीको निर्णय गरेको भन्दै आपत्ति जनाएका थिए ।

बिद्यालय बन्द भएपछि सामाजिक संजालमार्फत अभिभावकहरुले बिद्यार्थीहरुको पठ्नपाठ्न अबरुद्ध गर्न नहुने बरु बार्ताबाट समस्याको समाधान खोज्नुपर्ने भन्दै आक्रोश समेत पोख्दै आएका थिए । बिद्यालय बन्द भएपछि यसको सर्वत्र आलोचना हुँदै आएको थियो ।