२४ भाद्र, जनकपुरधाम । एनप्याब्सनको मुद्धामा जनकपुरधाम उपमहानगरपालिकालाई अनुगमनको कागजात पेश गर्न उच्च अदालतले आदेश दिएको छ ।
एन प्याबसन सहित जनकपुरधाम उपमहानगरपालिकाको संयुक्त टोलीले गत वर्ष नगरमा संचालित निजि विद्यालयहरुको अनुगमन गरेको थियो । अनुगमनको क्रममा जनकपुरधाममा करीब एक दर्जनको हाराहरीमा निजि विद्यालय दर्ता नै नगरी संचालनमा रहेको पाएको थियो । दर्ता गरेका केही निजि विद्यालयहरुको पनि कागजात चुस्त दुरुस्त अवस्थामा नरहेको उक्त अनुगमन टोलीले फेला पारेको थियो । त्यस यता जनकपुरधाम उपमहानगरपालिकाले अबैध बिद्यालय बन्द गर्न आग्रह गर्दा समेत निर्वाध रुपमा चलाउँदै आएका छन । पछि पालिकाले चासो लिन समेत छाडेका थिए । यता, दर्ता बिनै संचालनमा रहेका विद्यालयहरु बन्द हुनु पर्ने प्याब्सन, एनप्याब्सन लगायतका संस्थाहरुले माग गर्दै आईरहेका थिए ।
तर उपमहानगरले ती विद्यालयहरुलाई बन्द गराउन चासो नदेखाएपछि एनप्याब्सन जनकपुरधाम उपमहानगरपालिका बिरुद्ध उच्च अदालत जनकपुरमा पुगेको छ । दर्ता नरहेको विद्यालय बन्द हुनुपर्ने हाम्रो अडान छ तर उपमहानगर त्यसमा तयार भएन । त्यसैले अन्त्यमा बाध्य भएर हामीलाई अदालतको सहारा लिनु पर्यो एनप्याब्सन जनकपुरधामका नगर अध्यक्ष दीपक ठाकुरले भने । एनप्याब्सनले उपमहानगर बिरुद्ध परमादेश मुद्दा दर्ता गराएकोे हो ।
एनप्याब्सनको परमादेश मुद्दामा उच्च अदालत जनकपुरधामले उपमहानगरलाई कारण देखाउनुका साथै अनुगमनका कागजात लिएर उपस्थित हुन भनेको छ ।
