शिवराम झा ।
२० पुष, जनकपुरधाम । मतदाताहरुले अब उप्रान्त आफ्नो स्थायी बसोबास रहेको ठेगानबाट मात्र भोट हाल्न सकिने निर्वाचन आयोगले बताएको छ ।
नेपालको जुनसुकै स्थानबाट मतदाता नामावलीमा नाम दर्ता गराउन सकिने तर उक्त नामावली निजको स्थायी ठेगाना भएको स्थानिय तहको सम्बन्धित वडामा नै दर्ता हुने गरी पठाईने निर्वाचन आयोगको सूचनामा उल्लेख छ ।
यसरी नामावली स्थायी ठेगानामा नै रहेको सम्बन्धित वडामा पठाउँदा धेरै मतदाताहरु मत हाल्न बाट बञ्चित हुने देखिन्छ ।
यो पनि पढ्नुहोस
निर्वाचन आयोगको अदुरदर्शी सोच, मत हाल्नेको संख्यामा कमी आउने
यस अघि जुनसुकै स्थानबाट मतदाता नामावलीमा नाम दर्ता गराएर आफु बसेको अस्थायी ठेगानामा नै भोट हाल्न पाउने ब्यवस्था रहेकोमा अब देखि जुनसुकै स्थानबाट मतदाता नामावलीमा नाम दर्ता गराएको भए पनि नागरिकताको स्थान अर्थात स्थायी बसोबास गरेको ठेगानामा नै मतदाता नामावली पठाईने छ । यसरी नामावली स्थायी ठेगानामा नै पठाउँदा मतादाताहरुले सोही स्थायी ठेगानाबाट नै मत हाल्न सक्नेछन ।
यस किसिमको नियमबाट धेरै मतदाताहरु मत हाल्नबाट बञ्चित हुन सक्ने देखिएको छ । अहिलेको समयमा प्रायः धेरै मानिसहरु कामको सिलसिला वा बच्चाहरुको पालनपोषण र पढाईका लागि गाउँ छोडेर सयौ किलोमिटर टाढाको शहरमा बसोबास गरेको पाईन्छ । जसले गर्दा मत हाल्न त्यस मतदातालाई आफ्नो गाउँमै पुग्नुपर्ने बाध्यता हुन्छ । तर निर्वाचनको दिन सम्पुर्ण यातायात नै ठप्प हुन्छ अर्थात गाडी चलाउन निषेध गरिएको हुन्छ । यस्तो अवस्थामा सबै आफ्नो गाउँ ठाउँमा पुग्न सक्दैनन । खासगरी सुत्केरी, गर्भवती, बृद्ध तथा अपाङ्गहरुलाई बढी समस्या हुने र उनीहरु मत हाल्नबाट बञ्चित हुने निश्चित छ ।
तसर्थ निर्वाचन आयोगको यस्तो निर्णयबाट मतदाताहरुमा समस्या पर्न जाने निश्चित छ । त्यसैले निर्वाचन आयोगले यस्ता निर्णयलाई समयमै सच्याउनु जरुरी देखिन्छ ।