संस्थागत बिद्यालयहरुलाई पाठ्यपुस्तकको नामावली पेश गर्न ७ दिनको समय थप

११ चैत्र, जनकपुरधाम । जनकपुरधाम उपमहानगरपालिकाले पालिका भित्रका सम्पुर्ण संस्थागत बिद्यालयहरुलाई नयाँ शैक्षिक सत्रमा लागु हुने पाठ्यपुस्तकको नामावली पेश गर्ने समयसीमा बढाएर ७ दिन थपेको छ ।

पालिकाले यसअघि नै एक परिपत्र जारी गर्दै पाठ्यपुस्तकहरुमा एकरुपता कायम गर्न सम्पुर्ण संस्थागत बिद्यालयहरुलाई नयाँ शैक्षिक सत्रमा लागु हुने पाठ्यपुस्तकको नामावली पेश गर्न ७ दिनको समयसीमा दिएको थियो तर सो समयमा पनि बिद्यालयहरुले नामावली नबुझाएकोले पुनः ७ दिनको समय थप गरी समयमै नामावली बुझाउन आग्रह गरेको छ । साथै यस कार्यमा आवश्यक सहयोग गरिदिनका लागि संस्थागत बिद्यालयका छाता संगठनहरु प्याबसन, एन प्याबसन, मधेश प्याबसन र नेपाल प्याबसनसँग आग्रह समेत गरेको छ ।

संस्थागत बिद्यालय मापदण्ड तथा संचालन निर्देशिका २०६९ मा ब्यवस्था भए अनुसार बिद्यालयहरु आफैले पाठ्यपुस्तक तथा स्टेशनरी बिक्री गर्न नपाउने, बिद्यालयबाट निर्धारित ड्रेस कोडको नमुना बिद्यार्थीहरुलाई उपलब्ध गराउनुपर्ने र बिद्यालयले तोकेको स्थानमा पोशाक खरीद गर्न बिद्यालयहरुले बाध्य नगराउने ब्यबस्था हुँदाहुँदै कतिपय बिद्यालयहरुले बिद्यार्थी तथा अभिभावकहरुलाई बिद्यालयबाट नै पाठ्यपुस्तक, स्टेशनरी तथा पोशाक खरीद गर्न बाध्य पार्ने गरेको पालिकामा ग्ुनासो आएपछि पालिकाले यस्तो आग्रह गरेको हो ।
पालिकाले पाठ्यपुस्तक तथा पोशाक खरीदका लागि बिद्यालयहरुलाई निश्चित ठाउँबाट लिन बाध्य नपार्न अनुरोध गरेको छ । साथै, यसको उल्लंघन भएमा कानुन बमोजिम आवश्यक कारबाही हुने चेतावनी समेत दिएको छ ।

अभिभावकहरुलाई उल्लेखित पाठ्यपुस्तक तथा पोशाक खरीद गर्न बाध्य पारेको गुनासो आएपछि नेपाल पुस्तक तथा स्टेशनरी ब्यबसायी महासंघ धनुषाबाट प्राप्त उजुरीका आधारमा पालिकाले यस्तो परिपत्र गरेको हो ।