३ मंसीर, जनकपुरधाम । एन प्याबसन धनुषा जिल्ला कार्यसमितिले बिहिबार देखि धनुषा भरिका बिद्यालय बन्द गरी आन्दोलनमा जाने चेतावनी दिएको छ ।
हिसान, प्याबसन तथा एन प्याबसन नगर कमिटीको आग्रहलाई जनकपुरधाम उपमहानगरपालिकाले बेवास्ता गरेको भन्दै एन प्याबसन धनुषाले समेत उनीहरुको जारी आन्दोलनमा एक्यबद्धता जनाउँदै बुधबारसम्म माग सम्बोधन नभए मंसीर ६ गते बिहिबारदेखि धनुषाका सम्पुर्ण बिद्यालय अनिश्चितकालका लागि बन्द गर्ने चेतावनी दिएको हो ।
पालिकाले कुनियतबस निर्णय परिवर्तन गरेकोले एनप्याबसन धनुषाको गम्भीर ध्यानाकर्षण भएको भन्दै निर्णय सच्याउन जारी बिज्ञप्तिमा उल्लेख गरिएको छ ।
यस अघि कक्षा ११ र १२ को बिद्यार्थीहरुलाई दिईदै आएको छात्रवृतिमा निजी बिद्यालयले उठाउँदै आएको शुल्क पालिकाले नउठाउन भनेपछि निजी बिद्यालयका संघसंगठनहरु आन्दोलित भएका छन । आन्दोलनस्वरुप आज सोमबारदेखि जनकपुरधाम उपमहानगरपालिका अन्तर्गतका सम्पुर्ण निजी बिद्यालयहरु अनिश्चितकालका लागि बन्द गरी आन्दोलनमा उत्रेका छन । यता, निजी बिद्यालयहरुले यस सत्रमा पुरानै निर्णय अनुसार शुल्क उठाउन पाउनुपर्ने र नयाँ निर्णय आगामी सत्रदेखि लागु गर्न आग्रह गरेका छन । सो आग्रहमाथि पालिकाले कुनै निर्णय नगर्दा बाध्य भएर आन्दोलनमा जानु परेको निजी बिद्यालयका छाता संगठनहरुको ठहर छ । यसबाट उत्पन्न परिस्थितिका लागि अभिवावक तथा बिद्यार्थीहरुसँग क्षमा समेत माग गरेको छ ।
यहीबिच हिजो आईतबार नै पालिकाले एक बिज्ञप्ति जारी गरी बिद्यालयहरुमा बन्द हड्ताल नगर्न र वार्ताका माध्ययमबाट समाधानका लागि संवादमा आउन सम्बन्धित सबै पक्षहरुसँग आग्रह गरेको छ ।
