१२ कात्तिक, काठमाडौं । साफ वुमन्स च्याम्पियनसिपमा भारतलाई ट्राइब्रेकरमा ४-२ ले हराउँदै नेपाल फाइनल प्रवेश गरेको छ ।
निर्धारित समय १-१ को बराबरीमा सकिएपछि खेलको निर्णय ट्राइब्रेकरबाट भएको थियो । ट्राइब्रेकरमा नेपालका सावित्रा भण्डारी, गीता रानामगर, सविता रानामगर र अमिसा कार्की चारै जनाले गोल गरे ।
सुरुमा पेनाल्टी प्रहार गरेकी भारतकी कप्तान आशालतादेवीको प्रहार बारमा लागेर बाहिर गयो भने रञ्जना चानुको प्रहार नेपाली गोलकिपर अञ्जना रानामगरले बचाइन् ।
नेपालले पेनाल्टीसुटआउटलाई ध्यानमा राख्दै नियकित गोलकिपर तथा कप्तान एन्जिला तुम्बापोको स्थानमा अन्जना राना मगरलाई खेलको अन्त्त्यतिर मैदान पठाएको थियो । अन्जनाले एक पेनाल्टी रोकेर जितको नायक बनिन् ।
नेपालले अब उपाधिका लागि बंगलादेशसँग प्रतिस्पर्धा गर्नेछ । आइतबार नै बंगलादेशले भुटानलाई ७-१ ले हराउँदै फाइनल प्रवेश गरेको हो । यसअघि सन् २०२२ मा काठमाडौंमै भएको साफ वुमन्स च्याम्पियनसिपमा पनि यी दुई टोली भिडेका थिए । जहाँ नेपाललाई हराएर बंगलादेश पहिफो पटक च्याम्पियन बनेको थियो ।
नेपालले लगातार दोस्रो पटक साफ वुमन्स च्याम्पियनसिपमा भारतलाई पराजित गरेको हो । यसअघि सन् २०२२ मा काठमाडौंमै भएको छैटौं संस्करणमा पनि नेपालले भारतलाई सेमिफाइनलमै हराएको थियो । यस्तै खेल जितपछि नेपालले भारत विरुद्ध अपराजित यात्रा ४ खेल सम्म पुर्याएको छ ।
रेफ्रीको गलत निर्णय साम्बाको बदला
त्रिपुरेश्वरस्थित दशरथ रंगशालामा भएको खेलमा दुवै टोलीले गोल गर्ने केही मौका बनाए पनि सदुपयोग गर्न नसक्दा पहिलो हाफ गोलरहित बराबरीमा सकियो ।
तर दोस्रो हाफ भने नाटकीय बन्यो । रेफ्रीको गलत निर्णय, रातो कार्ड, दर्शकको रेफ्री आउट नाराबाजी र नेपालले गरेको गोलले मान्यता नपाएपछि दोस्रो हाफको खेल निकै तनावग्रस्त बन्यो । त्यही कारण खेल १ घण्टा ६ मिनेटसम्म रोकियो ।
तनावको सुरुवात ५१ औं मिनेटमा नेपाली फरवार्ड रेखा पौडेलले रातो कार्ड पाएपछि भएको थियो ।
रेखाले रातो कार्ड (दोहोरो पहेँलो कार्ड) पाएपछि नेपाल १० खेलाडीमा समेटियो । उनले बल रोक्ने कममा भारतीय खेलाडीलाई फल गरेको भन्दै रेफी ओम चोकीले रातो कार्ड दिएकी थिइन् ।
त्यसपछि दर्शकहरु रेफी आउट भन्दै नारा लगाउने देखि मैदानमा बोतल फाल्न थाले । मैदानको सिन्थेटिक ट्रयाकमा सुरक्षाकर्मीहरु नै आएर दर्शकलाई शान्त रहन भनिरहेका छन् । त्यतिबेला १० मिनेट अवरुद्ध भएर खेल सुरु भयो । त्यसपछि खेल ठीकठाक नै भइरहेको थियो । तर करिब १० मिनेटपछि माहोल फेरि बिग्रियो ।
नेपाल १० खेलाडीमा सीमित भएको फाइदा उठाउँदै भारतकी संगीता बासफोरेले ७१ औं मिनेटमा गोल गरी अग्रता दिलाएकी थिइन् ।
त्यसलगत्तै नेपालले गोल गरेपनि रेफ्रीले मान्यता नदिएपछि खेल तनावग्रस्त बन्यो । रेफ्रीले खेल सुरु भएको संकेत दिने सिठी बजाएपछि साम्बाले दिएको पासमा प्रिती राईले खाली पोस्टमा गोल गरेकी थिइन् । तर गोल सेलिब्रेसनका लागि मैदान बाहिर पुगेका भारतीय खेलाडी सम्हालिन नपाउँदै नेपालले गरेको गोलले मान्यता पाएन ।
भारतीय खेलाडीहरुले विरोध गरेपछि नेपालको गोललाई मान्यता दिइनन् । नेपाली खेलाडीहरुले रेफ्रीको निर्णय स्वीकार गरेनन् । यही विवादका कारण १ घण्टा ६ मिनेट खेल अवरुद्ध भयो ।
अनि खेल ६३ औं मिनेटबाट फेरि सुरु भयो । सुरु भएलगत्तै सावित्राले गोल गर्दै खेल १-१ को बराबरीमा पुर्याइन् । त्यसपछि जोशिएको नेपालले भारतमाथि केही आक्रमण गर्यो । तर दुबैपक्षबाट गोल नभएपछि खेलको निर्णय टाइब्रेकरबाट भयो ।
म्याच अफ दि प्लेयर बनेकी साम्बाले यो जित घाइते भएर प्रतियोगिता गुमाएकी हीराकुमारी शाही र दीपा भुलेजलाई समर्पित गरिन् ।
खेल अवरुद्ध भएको अवस्थामा समेत धैर्यतापूर्वक बसेर १२औं खेलाडीको भूमिका निर्वाह गरेको भन्दै उनले समर्थकहरुलाई समेत धन्यवाद दिइन् ।
