२१ असोज, जनकपुरधाम। विजया दशमीको अवसरमा जनकपुरधाममा यसवर्ष पनि लोकनृत्य झिझिया महोत्सव हुने भएको छ । नव मिथिला फाउण्डेशनको आयोजनामा अगामी बुधबार झिझिया हुन लागेको हो ।
नव मिथिला फाउन्डेसनले आज पत्रकार सम्मेलन गरी मिथिलाको लोक संस्कृति, लोक गायन र धार्मिक परम्परालाई संरक्षण गर्ने उद्देश्यले दोस्रो पटक झिझिया महोत्सव आयोजन गर्न लागेको जनाएको छ ।
फाउन्डेसनका अध्यक्ष अमित कुमारले गाउँगाउँबाट झिझिया टोली सँगै दुइ स्थानीय विद्यालयका छात्राहरुको टोलि झिझिया महोत्सवमा भाग लिने बताए।गतवर्ष झै यसपटक पनि पाँचसय जना टाउकोमा घैँटा राखेर झिझिया नाच्ने उनको भनाइ छ ।
जनकपुरस्थित रेल्वे स्टेसनको प्राङ्गणमा हुने महोत्सवमा धनुषाधाम समूह, अप्पन मिथिला झिझिया समूह जनकपुरधाम वडा नम्बर ४, जनकपुरधाम वडा नम्बर १२, मिथिलेश्वर झिझिया समूह, हिमाली बोर्डिंग स्कुल र जनकपुर एकेडमी स्कुल लगायतको झिझिया समुहले महोत्सवमा भाग लिने फाउण्डेशनका उपाध्यक्ष आदित्य नेपालले जानकारी दिए ।
