४ असोज, काठमाडौं । काठमाडौंको बानेश्वरमा प्रदर्शनरत शिक्षक र प्रहरीबीच धकेलाधकेल भएको छ।
बिहीबार दिउँसो माइतीघरदेखि बानेश्वरसम्म र्याली गरी प्रदर्शन गरेका शिक्षकहरूले प्रहरीले लगाएको ब्यारिकेड तोड्ने प्रयास गरेका हुन्।
प्रहरीले लगाएको ब्यारिकेडलाई उनीहरूले धकेलेर तोड्ने प्रयास गरेका हुन्। प्रहरीले पनि त्यसलाई रोक्न माइकिङ गर्ने गरिरहेको छ।
जिल्ला प्रहरी परिसर काठमाडौंका एसपी कुमोध ढुंगेलले प्रहरीले बल प्रयोग नगरेको बताए।
‘अलि धकेलाधकेल भएको छ। तर प्रहरीबाट बल प्रयोग भएको छैन,’ उनले भने।
शिक्षकहरूले सरकारले संसदमा दर्ता गरेको शिक्षा विधेयकको विरोध गर्दै अनिश्चितकालिन आन्दोलन सुरू गरेका हुन्। बुधबार देखि सुरू भएको आन्दोलन आफ्नो माग पूरा नभएसम्म जारी राख्ने बताएका छन्।