रौतहट, फगुन २३ गते । रौतहटमा चिकित्सकको डुलो लापरवाही बाहिरीएको छ । दुर्गा भगवती गाउँपालिका १ छतवनाका जितेन्द्र महतोकी १९ वर्षीय श्रीमती अम्बिका महतोको अप्रेसन गर्ने क्रममा डाक्टरहरुले पेटमा दुईवटा स्टिच निडिल सुई छुटाएको घटना बाहिरिएको हो ।
रौतहटको गंगा पिपरामा रहेको सरकारी अस्पतालमा प्रसूति पीडा भएपछि अम्बिकालाई भर्ना गरिएको थियो । उनको अप्रेशनमा डा. संजितकुमार साह नेतृत्वको टोली खटिएको थियो ।
गएराती अम्बिकालाई सुत्केरीको बेथा लागेपछि अस्पतालमा पुर्याइएको उनको परिवारले जानकारी दिएको छ । सुरुमा डा. संजितकुमारको टोलीले तत्काल अपरेसन गरेको थियो ।
अप्रेसनपछि स्वस्थ बालिकाको जन्म भएको जितेन्द्रको परिवारले जानकारी दिएको छ ।
अप्रेशनपछि डाक्टरले टाँका लगाउने स्टिच निडिल सुई पेटमै भुलेको बताइएको छ ।
अप्रेसन गरिएको केही घण्टामै सुत्केरी महिलाको पेटमा असह्य पीडा भएको र डाक्टरहरुकै आग्रहमा एम्बुलेन्स मगाएर अम्बिकालाई चन्द्रपुर अस्पताल चन्द्रनिगाहपुरमा लगिएको हो ।
यता चन्द्रपुर अस्पतालका प्रमुख डा. सुभाष चौधरीले सोमबार बिहान महिलाको पेटको पुनः अपरेसन गरेर पेटभित्र छुटेका २ थान स्टिच निडिल सुई निकालिएको जानकारी दिए ।
अहिले महिला र बच्चा दुबैको अवस्था सामान्य रहेको चन्द्रपुर अस्पतालले जनाएको छ ।
यता रौतहट प्रहरी प्रमुख एसपी बिनोद घिमिरेले घटनाको पुष्टि गर्दै त्यसमा डाक्टरको चरम लापरबाही रहेकोे प्रतिक्रिया दिएका छन् ।
Source: todaypati