३ माघ, जनकपुरधाम । प्रदेश २ को नाम मधेश प्रदेश राख्ने बिषयमा दुई तिहाइ बहुमतले पारित भएको छ । यस्तै प्रदेश २ को स्थायी राजधानी जनकपुरधाम कायम भएको छ ।
जसपा र नेकपा माओवादी केन्द्रको प्रस्तावित नाम मधेश प्रदेशमा प्रमुख प्रतिपक्षी दल लोकतान्त्रिक समाजवादी पार्टीले पनि समर्थन जनाएको थियो ।
प्रदेश २ सभामा हाल कायम १ सय ४ जना सांसद मध्ये ९९ मत खसेको थियो । जसमा ८० मत मधेश प्रदेशको पक्षमा खसेको थियो ।
प्रदेशको नाम राख्ने बिषयमा चारवटा नाम प्रस्ताव भएको थियो । जसमा नेकपा एसले जानकी प्रदेश, काँग्रेसले मिथिला भोजपुरा प्रदेश र काँग्रेसका सांसद राजेश्वर प्रसाद साहले मध्य मधेश प्रदेश नाम प्रस्ताव गरेका थिए ।
प्रदेश सभामा सोमबार राजधानीको नामका बिषयमा जनकपुरधाम राजधानी हुनु पर्ने सबै दलको संयुक्त प्रस्ताव दुई तिहाई भन्दा बढी मतले पास भएको हो ।
प्रदेश सभामा रहेको १०४ सांसद मध्ये ९९ मत खसेको थियो । जसमा ७८ मत जनकपुरधाम राजधानी हुनु पर्ने प्रस्तावमा खसेको थियो ।
जनकपुरधाम राजधानी हुनुपर्ने प्रस्तावमा उत्तरमा धनुषा ढल्केवरको पूर्वपश्चिम लोकमार्ग, पूर्वमा कमला नदी, दक्षिणमा नेपाल–भारत सीमा र पश्चिममा मिथिला माध्यमिकी परिक्रमा क्षेत्र रहेको छ ।
सभामुख सरोज यादवले जनकपुरधाम राजधानी भएको घोषणा गरेका हुन् ।
आज बसेको प्रदेशसभा बैठकमा मतदान पश्चात स्थायी राजधानी र नामको टुङ्गो लागेपछि मधेश सरकारले खुशीयाली मनाउन भोली सार्वजनिक विदा समेत दिएको छ ।
मधेश सरकारका प्रवक्ता एवं अर्थमन्त्री शैलेन्द्र प्रसाद साहले सामाजिक सञ्जाल फेसबुकमा प्रदेशको नाम मधेश प्रदेश र राजधानी जनकपुरधाम भएकाले मंगलवार प्रदेशभरि सार्वजनिक विदा दिइएको जानकारी दिएका हुन् ।