२४ कार्तिक, जनकपुरधाम । हेटौंडा–११ नवलपुरमा बस र ट्रक आपसमा ठोक्किँदा भएको दुर्घटनामा मृत्यु भएका २ मध्ये १ जनाको सनाखत भएको छ । मृत्यु हुनेमा यात्रुबाहक बस चालक चन्द्रागिरी नगरपालिका–२ काठमाडौंका २९ वर्षीय सरोज परियार रहेका प्रहरीले जनाएको छ ।
गएराति १२ : ३० बजेको समयमा पूर्व पश्चिम राजमार्ग अन्तर्गत हेटौंडा उपमहानगरपालिकाको नवलपुलस्थित सडकखण्डमा गएराति भएको सवारी दुर्घटनामा परेर घाइते भएका परियारको हेटौंडा अस्पतालमा उपचारको क्रममा मृत्यु भएको थियो ।
मृत्यु भएका दुई जनामध्ये अर्का एक जनाको सनाखत भने हुन सकेको छैन । ना ७ ख ८७६ नम्वरको यात्रुबाहक बसका चालक परियार जनकपुरबाट यात्रु बोकेर काठमाडौंतर्फ जाँदै गर्दा विपरित दिशाबाट आइरहेको प्रदेश नम्वर २– ०३० १ ख ५०३५ नम्वरको ट्रक आपसमा ठोक्किएर दुर्घटना हुँदा उनीसँगै आर्क एक जनाको मृत्यु भएको जिल्ला प्रहरी कार्यालय मकवानपुरका प्रहरी नायव उपरीक्षक जयश्वर रिमालले जानकारी दिए ।
दुर्घटनामा १८ जना घाइते भएका छन् । घाइतेहरुमध्ये १५ जनाको चुरेहिल अस्पतालमा र मकवानपुर सहकारी अस्पतालमा उपचार भइरहेको प्रहरी नायव उपरीक्षक रिमालले बताए । घाइते मध्ये बसका सहचालक जनक नन्दनी–६ बस्ने वर्ष १९ को शुवम झाको अवस्था गम्भिर रहेको प्रहरी नायव उपरिक्षक रिमालले बताए । घाइते झाको हेटौंडा–११ स्थित चुरेहिल अस्पतालमा उपचार भइरहेको प्रहरी नायव उपरिक्षक रिमालले बताए ।
घाइते हुनेहरूमा महोत्तरी बर्दिवास नगरपालिका–१४ बस्ने वर्ष ३९ को ज्ञानेन्द्र चौधरी, धनुषा बिदय नगरपालिका–३ बस्ने वर्ष २६ को महमद सकिल अमद, धनुषा बस्ने वर्ष ३५ को शम्भु दास रहेको प्रहरीले जनाएको छ । उनीहरूको मकवानपुर सहकारी अस्पतालमा उपचार भइरहेको छ ।
त्यस्तै मकवानपुरको मनहरी गाउँपालिका–९ ज्यामिरे बस्ने वर्ष ५९ को सुर्य ब.सुनार, धनुषाको सहिदनगर नगरपालिका–२ बस्ने वर्ष २६ को प्रवल कुमार यादव, धनुषाको धनुषा नगरपालिका–७ किसनपुर बस्ने वर्ष २८ को सुरेश सदा, धनुषाको धनैजी नगरपालिका–१ औरहि बस्ने वर्ष २१ को शम्भु कुमार महरा, धनुषा कमला नगरपालिका–२ राधे बस्ने वर्ष ३९ को रविन्द्र मण्डल, काभ्रेको मण्डन देउपुर नगरपालिका–७ बस्ने वर्ष २९ को हरी कुमार श्रेष्ठ, धनुषाको मिथिला नगरपालिका–९ बस्ने वर्ष २३ को कवि गिरी, धनुषा जनक नन्दनी गाउँपालिका–४ खजुरी बस्ने वर्ष ३८ को विपद दास, जनक नन्दनी गाउँपालिका–३ बस्ने वर्ष २० को अल्ताब राईम, कमला–२ बस्ने वर्ष ३७ को झगडु सहनी, जनक नन्दनी–३ बस्ने वर्ष ३७ को अवताबुल रहमान, सहिदनगर–५ बस्ने वर्ष ३२ को जितेन्द्र महरा, कमला–२ बस्ने वर्ष ३६ को राम भरौजी मुखिया, ट्रकको सहचालक निजगढ–४ बस्ने वर्ष २५ को बासुदेव गोले रहेका छन् । उनीहको अवस्था मध्यम स्तरको रहेको प्रहरीले जनाएको छ । उनीहरूको चुरेहिल अस्पताल मकवानपुरमा उपचार भइरहेको प्रहरी नायव उपरीक्षक रिमालले बताए । घटना बारे थप अनुसन्धान भइरहेको उनले बताए ।
ट्रकका चालक बाराको निजगढ नगरपालिका–४ पुरानोटोल बस्ने वर्ष ३३ को टंकबहादुर विक सामान्य सामान्य घाइते भएको र उनलाई उपचार पछि प्रहरीले नियन्त्रणमा लिएको छ । घटनाबारे थप अनुसन्धान कार्य जारी रहेको प्रहरीले जनाएको छ ।