७ असार, जनकपुरधाम । सरकारले आलु प्याजमा भन्सार शुल्क तथा कर बढाएपछि आलु प्याज ब्यबसायीहरुकोे बिरोध बढ्न थालेको छ ।
बिरोध स्वरुप जनकपुरधामको पेठिया बजार स्थित होलसेल तथा खुद्रा आलु प्याज ब्यापारीलाई आलु प्याजमा सरकारले कर शुल्क फिर्ता नलिएसम्म कारोबार बन्द राख्न दबाब दिईएको छ ।
पसल बन्द गर्ने या नगर्ने बिषयमा पनि ब्यबसायीहरु दुई कित्तामा देखिएको छ । एक पक्षले आलु प्याजको कारोबार रोक्नुपर्ने भन्दै बिहानैदेखि सबै होलसेल तथा खुद्रा पसलहरु बन्द गराएका छन भने त्यही केही ब्यापारीहरुले नै त्यसको बिरोध गरेको र बन्द गराए प्रतिकारमा उत्रिने चेतावनी समेत दिएका छन । आलु प्याजको कारोबार बन्द गर्दा आलु प्याज गर्मीमा बिग्रन सक्ने भन्दै केही ब्यापारीले त्यसको बिरोध समेत गरेका हुन ।
यसै बिषयलाई लिएर बन्द गराउने पक्ष र बन्द गर्न नमान्ने बिच केही क्षण चर्काचर्की समेत भएको थियो । दुई पक्ष बिच सामान्य झडपको अवस्था नै सिर्जना हुन थालेपछि तत्कालै प्रहरी पुगेर घटनालाई साम्य पारेको थियो ।
तर यसको कारोबार तत्कालै बन्द गर्ने या नगर्ने भन्ने सम्बन्धका आलु प्याज ब्यबसायी संघको धारणा आईसकेको छैन । उनीहरुले बैठक बसी निर्णय लिईने समेत जनाएको छ ।