२९ वैशाख, जनकपुरधाम । जनकपुरधामका स्वतन्त्र उम्मेदवार जानकीराम साहको पक्षमा मतदाता रिझाउन रकम वितरण गरेको मुस्लिम आयोगका अध्यक्ष समिम अन्सारीमाथि आरोप लागेको छ ।
जनकपुरधामस्थित सीताशरण होटलमा बसेर अन्सारीले मतदातालाई रिझाउन पैसा बाँडेको आरोप एमालेका कार्यकर्ताहरुले लगाएका छन् ।
एमालेका कार्यकर्ता अन्सारी बसेको होटल घेराउ गर्न एमालेका कार्यकर्ताहरु पुगेपछि सो क्षेत्र केहीबेर तनावपूर्ण बनेको थियो ।
मुस्लिम समुदायका अगुवालाई बोलाएर अन्सारीले रकम वितरण गरिरहेको सूचना पाएपछि आफूहरु त्यहाँ पुगेको नेकपा एमालेका जनकपुरधाम नगर कमिटी सचिव राजु साहले दाबी गरेका छन् ।
नेकपा एमालेका कार्यकर्ता पुगेर होटेल नै घेराउ गरेपछि प्रहरीको टोलीले अन्सारीलाई सुरक्षासहित बाहिर निकालेर एयरपोर्ट पुरयाएको बताईएको छ ।
अन्सारी अहिले काठमाण्डौ पुगिसकेको र आरोपको खण्डन गर्न आजै पत्रकार सम्मेलन गर्न लागिएको जानकारी गराएका छन् ।
अन्सारीले भने आफ्नो चरित्र हत्या गर्ने प्रयास भएको बताएका छन् ।
सामाजिक सञ्जाल फेसबुकमा एक भिडियो राख्दै अन्सारीले होटेलमा बसिरहँदा आफूमाथि अभद्र व्यवहार गरिएको बताएका छन् । उनले अभद्र व्यहवहार गर्न लाग्दा प्रहरीले सकुशल त्यहाँबाट निकालेर विमानस्थलमा पु¥याइदिएपछि अहिले काठमाडौं पुगेको बताएका छन् ।
यता, अन्सारीसँग होटलमा बितरण गर्न राखेको ५ करोड रुपिँया समेत बरामद भएको सामाजिक सँजालमा यतिबेला भाईरल भएको छ । साथै अन्सारी सो ५ करोड रुपिया सहित पक्राउ परेको खबर समेत सामाजिक सँजालमा फैलिएको छ । अहिले बिभिन्न उम्मेदवारको पक्षमा सो रकम बाँड्न लागिएको भन्दै टिकाटिप्पणी तथा आँकलन समेत गरिएको छ । तर यसको बिषयमा सत्यता रहे नरेहेको समेत पत्रकार सम्मेलन मार्फत खण्डन गरिने जनाएको छ ।
त्यस्तै, जिल्ला प्रहरी कार्यालय धनुषाका डिएसपी प्रदीप बहादुर क्षेत्रीका अनुसार अन्सारीसँग कुनै किसिमको रकम बरामद नभएको र उहाँलाई घेरा हाली केही ब्यक्तिले दुःख दिन थालेपछि हामीले सकुशल उद्धार गरेर बिमानस्थल पुरयाएका हौ । निर्वाचनका समय भएकाले पनि उहाँमाथि निराधार हल्ला फैलाईएको हो ।
अन्सारीलाई घेरा हाली अभद्र ब्यबहार गर्ने एमालेका सुरेन्द्र भण्डारी सहित केही युवालाई प्रहरीले नियन्त्रणमा समेत लिएको छ ।