१६ जेठ, जनकपुरधाम । तराई मधेशमा बढिरहेको अत्यधिक गर्मीका कारण जनकपुरधामका सम्पूर्ण सामुदायिक तथा संस्थागत विद्यालयहरुमा पाँच दिनका लागि बिदा दिईएको छ ।
जनकपुरधाम उपमहानगरपालिकाले बुधबार एक सूचना जारी गर्दै गर्मीका कारण बालबालिकाको स्वास्थ्यमा पर्नसक्ने प्रतिकूल असरलाई ध्यानमा राख्दै जेठ १७ गते बिहिबारदेखि २१ गते सोमबारसम्म वर्षे बिदाबाट कट्टा हुनेगरी उपमहानगरपालिका अन्तर्गतका सामुदायिक तथा संस्थागत विद्यालयहरुमा प्रशासनिक कार्यबाहेक पठनपाठन बन्द रहने जनाएका छन ।
त्यस्तै, तराई मधेस लगायत जनकपुरधाम क्षेत्रमा परिरहेको प्रचण्ड गर्मी र तातो हावाका कारण बालबालिकाको स्वास्थ्यमा प्रतिकुल असर पर्दै गइरहेकोले अभिभावकको आग्रह बमोजिम वर्षे बिदाबाट कट्टी हुनेगरी पाँच दिनसम्म यहाँका सम्पूर्ण विद्यालयहरु बन्द रहने निजी विद्यालयहरुको छाता संगठन प्याबसन तथा एनप्याबसनले पनि एक सुचना जारी गर्दै जानकारी दिएको छ ।
