९ जेठ, जनकपुरधाम । शैक्षिक सुधारका लागि जनकपुर उपमहानगरपालिकाले नीजि विद्यालयका प्रधानाध्यापक, सञ्चालक तथा सम्बन्धित पक्षहरुसँग छलफल गरेको छ ।
जनकपुरधाम उपमहानगरपालिकाका नगरप्रमुख मनोजकुमार साह तथा प्रमुख प्रशासकिय अधिकृत टेकराज पन्थी लगायतको उपस्थितिमा विद्यालयको गुणस्तरीयता कायम राख्न अपनाउन सकिने उपायका विषयमा छलफल भएको छ । प्याब्सन, एनप्याब्सन तथा मधेस प्याब्सन सम्बद्ध विद्यालयका प्रधानाध्यापक तथा सञ्चालकहरु सहितको उपस्थितिमा भएको सो छलफल कार्यक्रममा नगरप्रमुख साहले नगरभित्रका विद्यालयहरुमा शैक्षिक गतिविधि सुधार, अवैध विद्यालयमाथी निगरानी, परिक्षा प्रणालीमा सुधार लगायतका विषयमा कदम चाल्न उपमहानगर सदैव तयार रहने प्रतिवद्धता व्यक्त गरे । उनले बिना इजाजत संचालित विद्यालयलाई कारवाही गर्न तयार रहेपनि संघिय शिक्षा ऐनको अभावमा कतिपय कदम चाल्न अप्ठ्यारो भईरहेको ईंिकत गरे ।
२०२८ को शिक्षा ऐनलाई टेकेर उपमहानगरले स्थानीय शिक्षा ऐन निर्माण गरेको बताउँदै उनले उपमहानगरको शैक्षिक स्तर सुधारका लागि हरसम्भव प्रयास गरिने प्रतिबद्धता जनाए ।
छलफलमा सहभागी एनप्याब्सनका जनकपुरधाम नगर अध्यक्ष दिपक ठाकुरले दर्ताबिनाका विद्यालयहरुलाई अबिलम्ब बन्द गर्नुपर्ने सुझाव दिएका थिए । उनले भने, ‘दर्ताबिनाका विद्यालयहरुलाई या त बन्द गर्नुपर्छ नभए प्रक्रिया पुर्याएर वैधता प्रदान गर्नुपर्छ । त्यसपछि हाम्रो कुनै आपत्ति रहने छैन ।’
उनले उपमहानगरले यहाँका अवैध विद्यालयहरुलार्ई तत्कालै विद्यालय बन्द गर्न र दर्ताको प्रक्रियामा आउन आह्वान गर्दै चिठ्ठीसमेत काटिसक्दा पनि बेवास्ता गर्नु दुःखद रहेको सुनाए ।
ठाकुरले पाठ्यक्रममा मैथिली समावेश गर्न उपमहानगरसँग माग गर्दै परीक्षा प्रणालीमा सुधार हुनुपर्ने र पुरानै पाठ्यक्रम अध्यापन गराइरहेका केही विद्यालयहरुमाथि कारवाही गर्नसमेत माग गरे । उनले उपमहानगरले शैक्षिक सुधारका लागि चाँडै केही पहल नगरे प्याब्सन र एनप्याब्सनले कुनै सहकार्य नगर्ने चेतावनी समेत दिए ।
उपमहानगरले यसअघि समुदायिक विद्यालयका प्रधानाध्यापकहरुसँग पनि सम्वाद गरिसकेको छ ।
