८ असोज, जनकपुरधाम । राष्टप्रति रामचन्द्र पौडेल जनकपुरधामको प्रसिद्ध जानकी मन्दिरमा दर्शन तथा पूजा अर्चना गरेका छन् ।
राष्ट्रपति भएपछि पहिलोपटक जनकपुरधाम आएका उनले जानकी मन्दिरमा विशेष पूजा अर्चना गरेका हुन् ।
राष्ट्रपति पौडेलले जनकपुरधाम उपमहानगरपालिकाले व्यवस्था गरेको कपडाको चप्पल लगाएर जानकी मन्दिरको दर्शन तथा पूजा गरेका हुन् । यस विषयमा आलोचना भएको छ ।
आज दिउँसो जनकपुरधाममा जिल्ला प्रहरी कार्यालय अगाडि निर्मित महेन्द्रनारायण निधि मिथिला सांस्कृतिक केन्द्रको उद्घाटन गर्ने कार्यक्रम रहेको छ ।
सोही कार्यक्रममा उनलाई जनकपुरधाम उपमहानगरपालिले नागरिक अभिनन्दन गर्ने तय भएको छ ।
राष्ट्रपति जनकपुरधाम आएपछि सुरक्षाव्यवस्था कडा पारिएको छ ।
राष्ट्रपतिको स्वागतका लागि काँग्रेसका नेता, कार्यकर्ता तथा पत्रकारहरुको बाक्लो उपस्थित रहेको थियो । कार्यक्रम स्थल तथा पुजा स्थलमा पत्रकारहरुलाई पनि बिना पास छिर्न नमिल्ने ब्यवस्था गरिएको र काँग्रेस निकट पत्रकारहरुले मात्र सहज रुपमा पास पाएको भन्दै बिभिन्न सामाजिक संजालमा यसको आलोचना समेत भईरहेको छ । यता स्वागत देखि सम्मान कार्यक्रममा काँग्रेस निकट ब्यक्तिको पहुँच भएकै कारण यो काँग्रेसको पार्टीगत कार्यक्रम रहेको भन्दै पनि सामाजिक संजालमा चर्को आलेचना भएको छ ।
