१ कातिक, जनकपुरधाम । प्लान इन्टरनेशनल नेपालको पुर्वीय क्षेत्रीय कार्यालयको एक दिने प्रबन्धक अन्जु मगर बनेकी छिन ।
हरेक बर्ष ११ अक्टोबरका दिन मनाईने अन्तर्राष्ट्रिय बालिका दिवसको अवसरमा प्लान कार्यालयको क्षेत्रीय प्रबन्धकको रुपमा मंगलबार एक दिने भुमिकाका लागि मगरलाई सो पद हस्तान्तरण गरिएको हो ।
प्लानको पुर्वी क्षेत्रीय कार्यालयका प्रबन्धक रबि शंकर पंडितले १७ बर्षीय अन्जु मगरलाई आफ्नै भुमिकाको पद १ दिनका लागि हस्तान्तरण गरेका हुन ।
किशोरहरुको तुलनामा किशोरीहरु पछाडी छन र यसको कारण हाम्रो पित्तृसत्ता सोच र असमान शक्ति हो । गल्र्स टेकओवर कार्यक्रमले किशोरीहरुलाई आफु शक्तिशाली पदमा पुग्न सक्ने आफ्नो क्षमता माथि विश्वास गर्न सक्ने वातावरण सृजना गर्ने प्लान इन्टरनेशनल नेपाल पुर्विय कार्यलयका क्षेत्रिय प्रबन्धक रवि शंकर पण्डितले बताए ।
सो कार्यक्रममा प्रबन्धकका भुमिकामा रहेका मगरले किशोरीहरुको प्रतिनिधित्व हुने गरी ९ बुँदे ज्ञापन पत्र समेत प्रस्तुत गरेकी छिन ।
प्लान इन्टरनेशनलको Because I am a girl अभियानको पैरवीका कारण सन् २०११ मा संयुक्त राष्ट्र संघले हरेक वर्ष अक्टुबर ११ लाई बालिका दिवस घोषणा गरेसँगै अन्तर्राष्ट्रिय बालिका दिवस सन् २०१२ देखि संसारभर मनाउन थालिएको हो ।समाजमा जकडिएको लैंगिक विभेदका कारण बालकको तुलनामा बालिका तथा किशोरीहरू बढी विभेद, हिंसा, दुव्र्यवहारको जोखिममा हुने भएकोले यो दिवसको परिकल्पना गरिएको हो । यस वर्षको बालिका दिवसको नारा अब हाम्रो पालोः हाम्रो अधिकार, हाम्रो भविष्य (Our time is now—our rights, our future) रहेको छ ।
बाल अधिकार त्यसमा पनि विशेषतः बालिकाहरूलाई केन्द्रमा राखी कार्यरत संस्था प्लान इन्टरनेशनलले बालिका दिवसको अवसरमा विश्वभर नै ‘गर्ल्स टेक ओभर’ अर्थात ‘बालिका तथा किशोरीलाई पद हस्तान्तरण’ कार्यक्रमको आयोजना गर्दै आएको छ । विगत झैं यस वर्ष पनि संघीय र जिल्लास्तरमा #GirlsTakeOver अभियानलाई निरन्तरता दिने भएको छ । यस वर्ष संघीयस्तरका संघसंस्थाहरूका साथसाथै जुम्ला, कालिकोट, डोल्पा, मकवानपुर, धनुषा, सिन्धुली, सुर्खेत जिल्लामा अक्टुबर र नोभेम्बर महिनामा विभिन्न सरकारी निकाय, सघंसंस्था, मिडिया, दुताबास, शैक्षिक संस्था लगायतमा प्रमूख व्यक्तिको कार्यभार एक दिनका लागि एक किशोरीलाई हस्तान्तरण गरिन्छ ।
